Tussa
Om Tussa
(Tekst og foto: Tussa)
Tussa sin visjon er å skape framtidsretta og miljøvennlege løysingar. Vi produserer fornybar energi, byggjer og driftar digital infrastruktur, tilbyr IT-tenester frå eige datasenter og er ein stor elektroentreprenør.
Vi har hovudkontor i Hovdebygda i Ørsta kommune, og avdelingar i Ålesund, Ulsteinvik, Fosnavåg, Stryn, Åndalsnes og Stranda. 250 medarbeidarar jobbar i Tussakonsernet.
Tussa har valt å bruke nynorsk som forretningsspråk av fleire årsaker. Å vere lokal og kundeorientert er to av verdiane våre. Vi er lokalisert på Sunnmøre og Nordfjord, der nynorsk er hovudmålet for dei aller fleste, både kundar og medarbeidarar.
Nynorsk er med på å byggje identiteten og styrke stillinga vår som lokal tilbydar av internett, digital-TV og elektrikartenester. For oss er nynorsk ein effektiv måte å kommunisere med målgruppene våre på, og vi opplever at nynorsk marknadsføring og kommunikasjon kan skape ei kjensle av identitet og stoltheit.
Ved å vere medlem i Nynorsk bedriftsforum viser vi at vi støttar og fremjer bruken av nynorsk i samfunnet. Tussa ønskjer å styrke nynorsk og det språklege mangfaldet i Noreg, og håper vi kan inspirere andre bedrifter til å velje nynorsk som forretningsspråk.
