Bedriftsforumet med i Nynorsk forum
Nynorsk forum er eit samarbeidsorgan for nynorske institusjonar, organisasjonar og bedrifter. Den 19. oktober fekk Nynorsk bedriftsforum melding om at organisasjonen er teken opp som ny medlem i forumet.
Jan Thormodsæter (Foto: Mafoss)
– Det er ei stund sidan søknaden om medlemskap vart send, så vi vart glade då vi fekk meldinga om at vi no har ein plass i Nynorsk forum, seier styreleiar i Nynorsk bedriftsforum Jan Thormodsæter.
– Vi har eit håp om at medlemskapen kan hjelpe oss å nå fram i saker gjeld nynorsk i næringslivet.
Koordinering inn mot styresmaktene
Eitt av dei viktigaste måla for samarbeidsorganet Nynorsk forum er at alle skal samle seg om felles innspel, høyringsuttalar og språkplitiske krav til regjering, storting og politiske parti.
– Som talerøyr for nynorskbedriftene ønskar vi både å bidra og å hauste fordelar frå dette samarbeidet, seier Monika Haanes Waagan.
Waagan er dagleg leiar i Nynorsk bedriftsforum og er den som kjem til å stille på møta, som brukar å vere ca. 3 gongar i året.
Samarbeid med fleire formål
Nynorsk forum si liste over formål inkluderer også erfaringsutveksling, auka innsikt om kvarandre, samarbeid i enkeltsaker, mobilisering for nynorsk skriftkultur og framtida for nynorsken.
– Dette er formål som stemmer heilt overeins med arbeidet vi skal gjere i organisasjonen vår, seier Waagan.
– Å møte, samarbeide og knyte kontakt med andre nasjonale nynorskinstituasjonar, er svært verdfullt for oss.
Desse er med i Nynorsk forum:
Bondeungdomslaget i Oslo
Dag og Tid
Det Norske Teatret
Jærmuseet/ Garborgsenteret
Kringkastingsringen
Landssamanslutning av nynorskkommunar
Litteraturselskapet Det Norske Samlaget
Nemnda for Norsk Ordbok
Noregs Mållag
Noregs Ungdomslag
Norsk Barneblad
Norsk Målungdom
NRK Nynorsk mediesenter
Nynorsk avissenter
Nynorskfylket Vestland
Nynorsk kultursentrum, musea for skriftkultur
Nynorsk pressekontor
Nynorsksenteret, Nasjonalt senter for nynorsk i opplæringa
Det Vestnorske Teatret
Nynorsk bedriftsforum
