Skuffa over dei alternative statsbudsjetta
I september sa Sosialistisk Venstreparti at dei ønskte «å sikre at Nynorsk bedriftsforum får støtte gjennom statsbudsjettet». Men då SV la fram sitt alternative statsbudsjett 9. november, var dette utan løyvingar til Nynorsk bedriftsforum. Heller ikkje Venstre fann grunn til å løyve pengar til bedriftsforumet i sitt alternative budsjett.
SV er sett på som den føretrekte budsjettpartnaren til dagens regjering, så dialogen med SV fram mot budsjettforhandlingane i haust har vore særleg viktig for Nynorsk bedriftsforum.
- Signala frå SV har vore svært positive heile vegen, så dette var litt overraskande og veldig skuffande, seier Monika Haanes Waagan, dagleg leiar i Nynorsk bedriftsforum.
Venstre sitt alternative budsjett vart lagt fram 14. november, og heller ikkje her var det løyvt pengar til Nynorsk bedriftsforum.
Eit nasjonalt ansvar
Den nye språklova slår fast at det offentlege har ei særleg plikt til å fremje nynorsk som det minst brukte norske skriftspråket.
- Nynorsken har alltid stått relativt svakt i næringslivet, seier Waagan. - Samtidig er det her dei fleste nynorskbrukarane har arbeidet sitt. Rundt 2/3 av oss jobbar nemleg i privat næringsliv. Då er det eit stort paradoks at ingen nynorsktiltak blir retta denne vegen.
Mange sit åleine
I Noreg har meir enn 80 % av bedriftene fire eller færre tilsette. Nynorsk bedriftsforum erfarer at nettopp småbedriftene slit med å kunne bruke språket sitt fullt ut. Mange sit heilt åleine med utfordringar som bokmålsbedriftene aldri møter.
- Vi ser allereie at vi fyller ein viktig funksjon, både som eit verdfullt nettverk, eit felles talerøyr og ein stad å vende seg til med utfordringar knytt til den språklege arbeidskvardagen, seier Waagan.
Håpar SV held ord
I dag er arbeidet til forumet finansiert med medlemspengar og prosjekttilskot frå enkeltbedrifter. Resten er dugnadsarbeid. Men for å jobbe strategisk og målretta over tid, trengst det meir føreseielege og trygge økonomiske rammer for drifta.
- Vi meiner dette er eit ansvar politikarane må ta. No vil vi utfordre SV til å halde ord, justere budsjettet og støtte oss i arbeidet med å styrke nynorsken i næringslivet, seier Monika Haanes Waagan.
Publisert: 10. november 2023
Oppdatert: 15. november 2023
Monika Haanes Waagan (Foto: Nynorsk bedriftsforum)
