Skal det vere ein teaterstol?
Det Norske Teatret vil gjennom kampanjen «Tett gapet» invitere alle nynorskvennar til å lage drama. Den økonomiske situasjonen er trong, og teatret ser seg nøydd til å ta grep for å kunne halde på krafta og det kunstnarlege oppsvinget som Det Norske Teatret har opplevd det siste tiåret.
Teatersjef Erik Ulfsby lanserte kampanjen Tett gapet under Festspela 9. juni. (Foto: Monika Haanes Waagan)
Medan Det Norske Teatret har vakse kunstnarleg, har den faktiske verdien av dei statlege løyvingane krympa markant. Derfor startar teatret no kampanjen Tett gapet.
Målet med kampanjen
• Økonomisk likestilling. Staten bør følgje opp si eiga språklov med å likestille det nynorske nasjonalteateret/Det Norske Teatret med Nationaltheatret.
• Kompensasjon for tapt løns- og prisauke. Dei siste 30 åra har Det Norske Teatret mista nær ein million i året, medan norsk språk og norsk kultur taper terreng i eit stadig meir globalisert underhaldningstilbod.
Slik kan bedrifta di bidra
Å kjøpe ein symbolsk stol i salen på Hovudscenen er berre ein av måtane du og nynorskbedrifta di kan støtte aksjonen.
Det Norske Teatret sel også historiske plakatar og billettar til direktestrøyming av framsyningar. Kanskje ei passande sommargåve til heldige tilsette?
For 10.000 kroner kjøper du ein symbolsk stol i salen på Hovudscenen, og får namnet ditt på ein plakett.
