Språkrådet møter næringslivet

Som ein del av programmet sitt på Sunnmøre denne veka, kjem direktør i Språkrådet Åse Wetås på frukostbesøk til Skaparhuset i Ulsteinvik fredag 20. september. Det er Nynorsk bedriftsforum og Ulstein Næringsforum som står bak arrangementet.  

Wetås vil halde innlegg om Språkrådet si rolle i samfunnet og korleis deira arbeid kan vere relevant for næringslivet. Ho vil også snakke om KI, norske generative språkmodellar og språkleg identitet.

– Dette arrangementet er gratis og ope for alle, uansett om du skriv bokmål eller nynorsk. Det er berre å gle seg til hyggeleg og lærerikt frukostmøte på Skaparhuset, seier sentrumskoordinator i Ulstein Næringsforum Rebekka Louise Knotten.

– Det er viktig at nynorsk kan brukast på alle samfunnsområde, også i næringslivet. Her har mange verksemder på Sunnmøre teke mykje ansvar for å vise fram nynorsk som eit likeverdig næringslivsspråk, seier direktør i Språkrådet Åse Wetås før besøket.

I tillegg til frukostmøtet på fredag skal Språkrådet ha møte med Nynorsk bedriftsforum og besøke Ulstein Group, ei av medlemsbedriftene i bedriftsforumet.

– Vi er glade for at Språkrådet ønsker å møte Nynorsk bedriftsforum. Språkrådet følger opp den nye språklova, men vi saknar tiltak som styrkar nynorsk i næringslivet. Vi kjem nok til å formidle kva utfordringar nynorskbedriftene står overfor, og vi håpar Språkrådet kan ta med seg nokre gode innspel tilbake, seier Monika Haanes Waagan, dagleg leiar i Nynorsk bedriftsforum.

Direktør i Språkrådet Åse Wetås
Foto: Moment Studio